СИАХСЦЫД

см. СИАХСЦЫД – перевод

Чындзы куы рахæссынц, уыцы изæр сиахс къухылхæцæг кæнæ æмдзуарджын æмæ цалдæр лæппуимæ ацæуы йæ каистæм. Уый хуыйны сиахсцыд (кæс Сиахсы цыд).

Чызгæрвитджытæ, хионтæ æмæ сыхæгтæ се ппæт сæ хæдзæрттæм нæма ацæуынц, чидæртæ та дзы сæрмагондæй сиахсы феныны тыххæй баззайынц.

Чызджы бинонтæ, сыхаг лæппутæ æмæ чызджытæ уазджытыл бацин кæнынц, саразынц сын фынг. Сыхаг лæппутæй исчи сбады хистæрæн.

Сиахс æмæ йе ‘мбæлттæ семæ ахæссынц къафеттæ æмæ сæ сылгоймæгтæ æмæ чызджытыл байуарынц. Уыдон сын фæарфæтæ кæнынц.

Иу рæстæг сиахс æмæ йе ‘мбал лæппутæ æфсинтæм бацæуынц. Æфсинтæ сын нуазæнтæ авæрынц. Хæдзары хистæр сылгоймаг йæ нуазæн ратты сиахсмæ, иннæтæ та, кæмæн куыд æмбæлы, афтæ. Сиахс æмæ йе ‘мбæлттæ раарфæ кæнынц, йе гъдау æмæ йе фсарм кæмæн куыд амоны, афтæ агуывзæйы æхца сæвæрынц æмæ сæ фæстæмæ раттынц.

Дыккаг бон чындзæн йæ цæгат æрбахæссынц хуын. Хуындзаутæ – цалдæр адæймаджы, æвзæрст фæсивæд, æгъдауджын, иу сын хистæр. Лæппуйы бинонтæн сæ бон куыд у, афтæ барæвдауынц уазджыты, саразынц хъазт.

Чындзæн йæ цæгатæй йемæ вæййы иу-дыууæ лæппу кæнæ чызг-æмбалы. Хуындзаутæ куы сбадынц, уæд сын уыдон æртæ чъирийы рахæссынц. Хуындзаутимæ ацæуынц фæстæмæ. Дыккаг бон дæр æмæ æртыккаг бон дæр сыхы сывæллæттæ чындзмæ уынæг фæцæуынц, æмæ сæ уый истæмæйты барæвдауы, чызджытыл лентытæ бабæтты.

кæс ИРОН ÆГЪДÆУТТÆ